Xi Termini Letterarji...

Alliterazzjoni:   ir-ripetizzjoni tal-istess ittra, fl-istess vers.

Eż. “jew b’sebgħek tinbex xi bebbux fil-bejta”, Żagħżugħ ta’ Dejjem, pġ. 22.

Anadiplosi:       ir-ripetizzjoni ta’ kelma, jew frażi, li tkun fl-aħħar tal-versi u fil-bidu tal-vers li jmiss.

Eż. “U Freddie l-buli,                                                                                           Buli aktar ma baqax!”, Geraldine, pġ. 26

Anafora:                    ir-ripetizzjoni ta’ kelma jew iżjed fil-bidu ta’ versi taħt xulxin.

Eż. “ta’ ferħ, ta’ tgawdija,                                                             

       ta’ dawl u ta’ dija”, Niftakar, pġ. 7

Antiteżi:             it-tqegħid flimkien ta’ żewġ kunċetti li jfissru l-maqlub ta’ xulxin u li għalhekk joħolqu kuntrast bejniethom.

Eż. “Il-bankijiet kienu jistennew minn waqt għall-ieħor li xi ħadd iħenn għalihom u jaħraqhom”, Bank, pġ. 59

Apostrofi:          indirizz poetiku.

                                    Eż. “ja baħar”, Żagħżugħ ta’ dejjem, pġ. 22

Asindeto:          il-qtugħ ta’ konġunzjoni bejn għadd ta’ kliem wara xulxin.

                                    Eż. “Imxi metru, ibni villa”, Aqta’ Fjura u Ibni Kamra, pġ. 20

Binja

L-istrofa: stanza minn poeżija.

                 Distiku

                 Terzina

                 Kwartina…

            Il-versi: ara Metru

Ir-rima:    qbil fil-versi.

                 Alternata (a-b-a-b)

     Ħielsa (bla skema)

     Imbewsa (a-a-b-b)

     Interna/ġewwiena (rima fl-istess vers)

     Imqabbża (a-b-ċ-b)

Ċesura:              waqfa li tinħass fil-vers minħabba r-ritmu naturali tal-lingwa, mhux minħabba l-metrika.

                     Eż. “Anke l-baħar agħmel tiegħek”, Aqta’ Fjura u Ibni Kamra, pġ. 20

Eliżjoni:              il-qtugħ ta’ vokali fl-aħħar tal-kelma quddiem vokali jew għ jew h tal-kelma ta’ warajha.

                                   Eż. “darb’oħra”, B’Idejna, pġ. 19

Enjambment:   it-tkomplija ta’ vers fil-vers ta’ warajh mingħajr ebda waqfa bejn il-vers u ta warajh.

Eż. “Minn xebba u għarusa                                                     

       F’jum wieħed dil-mara                                                                

       Ittejjeġ u tormol”, Katrin tal-Imdina, pġ.36

Epiżewksi:        ir-ripetizzjoni ta’ kelma jew aktar wara xulxin, għall-enfasi.

                                    Eż. “ftit, ftit”, Niftakar, pġ. 2

Ewfemiżmu:     mod ta’ taħdit jew kitba li biha titnaqqas il-kruha ta’ ħaġa, iżda xorta jinftiehem kollox.

Eż. “…dak jiġi mneħħi mid-dinja”, Ix-Xini Jimxi fl-Art, pġ. 45

Iperbole:            esaġerazzjoni magħmula apposta biex tenfasizza xi ħaġa.

                                    Eż. “Kollox nafu dwar ir-riħ!”, Fejn Jorqod ir-Riħ, pġ. 21

Ironija:                Il-ħabi tat-tifsira vera f’taħdit li qed jgħid il-kontra.

                                    Eż. “Imxi metru, ibni villa”, Aqta’ Fjura u Ibni Kamra, pġ. 20

Metafora:           kliem jew frażi mqabbla m’affarijiet li ma jkollhomx x’jaqsmu f’sens litterali; paragun moħbi.

                                    Eż. “Fejn huma l-għeruq?”, Quo Vadis?, pġ. 6

Mistoqsija rettorika:   mistoqsija effettiva li għaliha l-kittieb ma jkun qiegħed jistenna l-ebda tweġiba.

Eż. “X’inhi l-kelma qed tirtogħod                                            

       Hemm fuq ix-xefaq ta’ dan il-jum?”, Jum San Valentin, pġ. 18

Onomatopea:   kelma li turi l-ħoss li trid tfisser.

                                    Eż. “seksieka”, Il-Koranta, pġ. 37

Paradoss:         stqarrija li tmur kontra stqarrija oħra.

                                    Eż. “nemmen u niċħad”, Jien, pġ. 17

Paralleliżmu:    il-bini ta’ versi jew sentenzi, bl-użu tar-repetizzjoni, b’mod li kull parti tingħata l-istess importanza permezz ta’ xebh jew kuntrasti.

Eż. “Hemm passaġġi”, Passaġġi, pġ. 5

Personifikazzjoni:  meta kittieb jew poeta jagħti kwalità umana lil xi ħaġa li mhix bniedem.

                                    Eż. “Spalliera li waħedha baqgħet tistenna…”, B’Idejna, pġ. 19

Polisindeto:      it-tirbit tal-partijiet ta’ frażi b’użu tal-konġunzjoni mtennija.

Eż. “u l-għafsa ta’ idek ma’ driegħi,                                               

       u l-ħeġġa ta’ wiċċek ħamrani,                                                                                             u l-mantar bajdani”, Niftakar, pġ. 7

Sarkażmu:        diskors ironiku li mad-daqqa t’għajn jidher li qed ifaħħar iżda fil-verità jkun qed jikkritika u jniġġeż.

Eż. “Aqta’ fjura u ibni kamra;                                                   

       Aqta’ siġra u tella’ dar;                                                                   

       Imxi metru, ibni villa;                                                             

       Tinkwetax…dak li sar sar”, Aqta’ Fjura u Ibni Kamra, pġ. 20

Similitudni:       tixbih jew paragun bejn żewġ affarijiet bl-użu ta’ kliem bħal: qisu, donnu jixbah, bħal, tistħajlu.

                                    Eż. “qisha ballun”, Jum San Valentin, pġ. 18

Sineddoke:       issemmi parti minn ħaġa u tinftiehem il-ħaġa sħiħa.

Eż. “poplu qed jistenna wara l-bieb ta’ uffiċċju pubbliku”, B’Idejna, pġ. 19

Ton:                     il-burdata tal-poeta espressa mill-kliem li juża u mill-mod kif jibni l-kitba tiegħu.

                                   Eż. Ton traġiku: “aħbat, idrob, infed, oqtol…” Katrin tal-Imdina

Metru:

            Vers ħieles:      vers ta’ tul differenti mill-bqija.

Versi mħallta:   versi regolari mħalltin flimkien.

Vers regolari:   versi li jżommu dejjem l-istess numru ta’ sillabi, eż.

Binarju: vers b'żewġ sillabi

Ternarju: vers bi tliet sillabi

Kwaternarju: vers b'erba' sillabi

Kwinarju: vers b'ħames sillabi

Senarju: vers b'sitt sillabi

Settenarju: vers b'seba' sillabi

Ottonarju: vers bi tmien sillabi

Novenarju: vers b'disa' sillabi

Dekasillabu: vers b'għaxar sillabi

Endekasillabu: vers bi ħdax-il sillaba

Kif nikteb...Komponiment Letterarju

L-ewwel pass:
Importanti li qabel ma tibda tikteb, tara x’poeżiji u siltiet għamilt s’issa.

It-tieni pass:
Ftakar x’jgħidu s-siltiet u ara għandhomx rabta mat-titlu.

It-tielet pass:

Bħal kull komponiment, il-komponiment letterarju jrid ikollu:

1.Id-daħla (l-introduzzjoni)

2.Il-qafas (l-iżvilupp)

3.L-għeluq (il-konklużjoni)

Ara l-eżempju:

********** **********

It-titlu:

Fl-antoloġija Bejn Ħaltejn naraw illi l-kittieba jiktbu dwar figura femminili f’ħafna mill-kitbiet.
Ikkummenta.

Liema poeżiji u siltiet, milli għamilt s'issa, jitkellmu l-aktar dwar figura femminili?

Poeżiji:

Refuġjata: Iva
Lill-Qamar Kwinta: Le
Passaġġi: Le
Quo Vadis?: Le
Niftakar: Iva

Siltiet:

Aqrali xi Ħaġa Ġdida, Qaltilha: Iva
Il-Koranta: Iva
Ittri lil Marta: Iva
Ix-Xini Jimxi fl-Art: Le
Jacqueline: Iva

*****

  Fl-antoloġija ‘Bejn Ħaltejn’ naraw illi xi kittieba jużaw il-figura femminili fil-kitbiet tagħhom. Xogħlijiet bħal ‘Refuġjata’ u ‘Jacqueline’, fost oħrajn, jixhdu dan.

  Fil-poeżija ‘Refuġjata’, Mario Azzopardi juża l-figura femminili li ħarbet mill-pajjiż għax qatlulha lil uliedha, ħadulha lil żewġha u spiċċat bla dar.  Il-poeżija turi refuġjata li spiċċat bla tama li se terġa’ tara lil uliedha iżda fl-istess waqt tixtieq u tittama għal futur aħjar. ‘Niftakar’ hija poeżija awtobijografika, li fiha Anton Buttigieg jikteb dwar iż-żwieġ ma’ martu, l-istess mara li aktar tard tmur tiltaqa’ mal-Mulej.  Il-mara, għall-poeta, kienet figura importanti. Tant hu hekk li meta tmut hi, “il-Baħħ” biss joħdilha postha.

  Claire Azzopardi, f’ ‘Aqrali xi ħaġa ġdida, qaltilha’, tuża l-karattri femminili sabiex turi l-inugwaljanza bejn is-sessi fl-imgħoddi.  Fis-silta niltaqgħu ma’ familja li taħdem ġo stamperija. Filwaqt li l-missier qatt ma ried jippubblika xogħlijiet in-nisa, martu, sadattant, kienet tagħmilhom bil-moħbi tiegħu. F’ ‘Il-Koranta’ niltaqgħu m’Anjeżi, mara ta’ erbgħin sena li dejjem titlob lil San Ġużepp sabiex ilaqqagħha ma’ raġel. Tul in-novella, Oliver Friggieri jurina minn liema tbatija għaddiet din il-mara minħabba nuqqas ta’ rispett minn ta’ madwarha.

  Marta, fis-silta ‘Ittri lil Marta’, hija mara li bdiet tirċievi ittri mhux iffirmati mingħand żagħżugħ, li kien jiddeskrivilha lilu nnifsu u l-gosti tiegħu. Hija tfajla normali ħafna, li kellha emozzjonijiet u li fl-aħħar batiet għax persuna oħra lagħbet mas-sentimenti tagħha. ‘Jacqueline’ hija silta ħelwa, li fiha Pierre Mejlak jinqeda bil-karattru tal-mara tul is-silta kollha.  Hawnhekk naraw lil Jacqueline, mara kuraġġuża, li qalb ħafna ħars u xi tbissima ’l hawn u ’l hinn, marret tistaqsi hija stess lil Mario, raġel mistħi ħafna, biex imorru jieħdu pizza flimkien.

  Kif rajna f’dawn is-sitt kitbiet, l-awturi għandhom ħabta jużaw il-figura tal-mara. Jista’ jkun li dan jagħmluh biex iżewqu l-kitba tagħhom u jagħmluha aktar interessanti peress li, normalment, in-nisa joħorġu aktar emozzjonijiet, inkella biex, bħal Anton Buttigieg, jiftakru f’dik il-mara li tant ħabbew.

Kif nikteb...Ittra Informali

Niktbu ittra informali meta nkunu ser niktbu lil xi persuna b'kariga li jkollna l-kunfidenza magħha jew miegħu. Ngħidu aħna l-ħbieb jew xi ħadd minn tal-familja tagħna.

• Ittra informali jrid ikun fiha biss l-indirizz tiegħek.
• Ikteb id-data taħt l-indirizz.
• Uża dejjem il-kelma Għażiż jew Għażiża.
• Xħin tiġi biex tagħlaq l-ittra, uża frażijiet bħal Dejjem tiegħek, il-Ħabib/a tiegħek jew tista' wkoll tħallihom barra.
• Taħt nett ikteb ismek.

Ara l-eżempju:

********** **********

60, Triq ix-Xatt
Ħal Muxi
ĦMX 6060

31 ta' Jannar 2013

Għażiż Clayton,

Qed niktiblek biex nirrakkuntalek x'biċċa ġratli llum!  Xi nies ġew u żebgħu xi kaxxa safra quddiem il-garaxx tiegħi. Mhux talli hekk, talli ġol-kaxxa kitbu 'Parkeġġ riservat għall-vettura VVI 551'.

Illum ktibt lid-direttur tat-Trasport Malta biex jinvestiga u jieħu ħsieb dan il-każ.  Ma rridx nispiċċa nitlob il-permess lil ħaddieħor biex iċaqlaq il-karozza tiegħu minn quddiem il-garaxx tiegħi stess.

Clayton, nittama li ma ndumx ma nerġa' niktiblek u ngħarrfek dwar dak kollu li ġara.

Il-ħabiba tiegħek,

Phyllisienne

Kif nikteb...Ittra Formali

Niktbu ittra formali meta nkunu ser nikbtu lil xi persuna b'kariga importanti, li ma nkunux nafuha personalment jew li ma jkollniex kunfidenzi magħha.

• Ittra formali jrid ikun fiha żewġ indirizzi: wieħed tiegħek u l-ieħor ta' min se tikteb l-ittra.

• Ikteb id-data taħt it-tieni indirizz.

• Meta tindirizza lil min se tikteb, trid tagħmlu b'mod formali, eżempju Sur Sindku, Sur Direttur, Għażiża Sinjura Borg, Sinjur Mallia, Onorevoli Ministru, L-Eċċelleza tiegħu.

• Xħin tiġi biex tagħlaq l-ittra, uża frażijiet bħal Dejjem tiegħek, Għoddni tiegħek, Tislijiet.

• Taħt dawn, iffirma u ikteb ismek sħiħ.

Ara l-eżempju:

********** **********

60, Triq ix-Xatt
Ħal Muxi
ĦMX 6060

Trasport Malta
Triq Vincenzu Dimech
Il-Furjana
FRJ 5805

Il-Ħamis, 31 ta' Jannar 2013

Sur Direttur,

Qiegħda niktiblek din l-ittra biex ninfurmak dwar il-linji sofor li għadhom kif żebgħu quddiem il-bieb tal-garaxx tiegħi.  Għall-ewwel ħsibt li dawn għamluhom biex juru lill-pubbliku li l-garaxx tiegħi huwa riservat u allura ma jistgħux jipparkjaw quddiemu.  Iżda mbagħad innotajt li hemm miżbugħ ukoll 'Parkeġġ riservat għall-vettura VVI 551'.  Din il-vettura m'hijiex tiegħi.

Jekk jogħġbok ħu l-passi meħtieġa biex dawk il-linji sofor jiġu mħassra mill-aktar fis ħalli quddiem il-garaxx tiegħi nipparkja jien biss, kif inhu bi dritt.

Dejjem tiegħek,

(Firma)

Phyllisienne Mallia

Il-Kantilena - Pietru Caxaro

Isma' l-Kantilena moqrija...

http://www.akkademjatalmalti.com/filebank/Pietru%20Caxaro%20-%20Il-Kantilena.mp3

Bastiment fil-Mewġ (komponiment)

Minn Luke Cassar - 4.2 - Sena Skolastika 2011/2012

Xi sentejn ilu, waqt li kont qiegħed ix-xogħol, smajt, mingħand xi ħaddiema, li bastiment li kien qiegħed iġorr ammonti kbar ta’ ikel u xorb għeb minħabba li tbiddlet id-direzzjoni tiegħu.

Kulħadd baqa’ ssummat b’din il-ġrajja u kulħadd kien ħerqan biex jara kif ħa tiżvolġi l-biċċa tax-xogħol.  Id-diskussjoni waqt il-brejk ma waqfitx u kulħadd qala’ l-qlajjiet tiegħu dwar x’seta’ nqala’, jew aħjar dwar x’kien se jiġri.  Dik il-ġurnata, l-20 ta’ Mejju 2010, kienet waħda li fiha l-kumpanija li kont naħdem fiha tilfet ammont sostanzjali ta’ flus.  Dan kollu ġara minħabba l-ġrajja tal-bastiment Kolombjan.  Il-ħin tat-tluq mix-xogħol wasal u għalhekk kulħadd telaq għal rasu biex jinġabar flimkien ma’ familtu u jqatta’ l-kumplament tal-ġurnata magħha.

Għall-ħabta tal-ħamsa wasalt lura d-dar fejn hemm sibt lill-mara u lit-tfal jistennewni għall-ikla.  Wara l-ikla rqadt nofs siegħa.  Is-sitta kienu għadhom kemm skorrew meta sejjaħt lil marti u nfurmajtha li kont sejjer sal-każin.  Dak iż-żmien l-aħbarijiet kienu jkunu fis-sitta u nofs u fit-tmienja.  Ma tantx kont ilni li wasalt meta ndunajt li l-aħbarijiet kienu diġà bdew.  Kont ħerqan biex nisma’ l-aħbarijiet u għalhekk, x’ħin semmew il-bastiment Kolombjan mal-ewwel ftaħt widnejja beraħ, u bdejt nisma’.

“Bastiment Kolombjan, li kmieni wara nofsinhar instab lejn l-Ewropa, kien għaddej minn rotta żbaljata wara li ġie maħkum minn maltemp qalil u riħ qawwi.”

Kulħadd beda jistagħġeb b’din l-aħbar.  Jien kont pront okkupajt il-kompjuter li kien jinsab taħt it-taraġ tal-każin u bdejt nagħmel ir-riċerka tiegħi.  Ksibt ħafna informazzjoni dwar dan il-bastiment, fosthom l-isem, u sibt ukoll li kien qiegħed iħabbat wiċċu ma’ maltemp aħrax.  Il-bastiment SRE 650, mill-oċean Paċifiku spiċċa fil-baħar Mediterran!

L-aħbarijiet tat-tmienja kienu waslu biex jibdew u għalhekk inġbart ma’ sħabi biex insewguhom.  L-ewwel aħbar, peress li kienet l-aktar waħda importanti, kienet dwar il-bastiment u għalhekk sikkitt lil sħabi u bdejt nisma’.  Xi tagħrif li kisbu kien li dan il-bastiment wasal f’oċean ferm ’il bogħod minħabba l-fatt li ġie misruq mill-pirati.  Dawn ħadu r-riedni f’idejhom u sewwa jgħidu “tidħolx bejn il-basla u qoxritha għax tibqa’ b’riħitha”!  Minħabba li ma kinux jafu jsuqu vapur, dawn spiċċaw biex biddlu d-direzzjonijiet kollha.

Pulizija apposta qabdu l-vapuri tagħhom u marru ħdejn il-bastiment biex isalvaw lil min kien fuqu mingħajr ħtija.  Ma damux ma waslu fuq il-post u dritt qabżu ġo fih biex jinvestigaw is-sitwazzjoni.  Sal-għada filgħodu l-aħbar kienet fuq il-gazzetti kollha, fl-ewwel paġna.  Kulħadd baqa’ miblugħ meta sema’ li ġlieda fuq il-bastiment Kolombjan ħalliet lill-pulizija kollha mejta.  Intqal li dan il-bastiment wasal lejn l-Indi fejn hemm in-nies kollha ta’ fuqu ġew mibjugħin bħala priġunieri.

Il-bastiment instab l-għada stess viċin l-oċean Indjan, iżda l-pirati baqgħu ma nstabu qatt.  In-nies li kienu jinsabu fuqu ġew meħlusin xi xahar wara, meta numru ta’ pulizija ssograw ħajjithom u pprovaw isalvawhom, u l-pjan irnexxa.

Sal-lum il-ġurnata l-pirati għadhom ma nstabux u għalhekk nistgħu ngħidu li dan kollu baqa’ misteru kbir!

L-Oqsma tal-Għerf tal-Kultura Maltija - TEMI KURRENTI (Proġett - Form 3)

Il-proġett se jkun fih dawn is-sottotitli:

• L-ambjent tad-dar
• L-ambjent naturali
• Id-divertiment
• L-ivvjaġġar
• Il-kura tas-saħħa
• L-edukazzjoni
• Ix-xiri

Temi Kurrenti:

L-ambjent tad-dar

Tkellem dwar id-differenzi minn qabel:

1.Illum aktar kumdità, u qabel ħafna drabi kienu aktar fqar;

2. Illum kmamar żgħar, qabel ħafna drabi kmamar kbar;

3. Illum ġieli ma jkollokx bitħa, qabel ħafna drabi bil-bitħa fin-nofs

4. F’Malta s-soqfa differenti minn ta’ barra minħabba s-silġ.

L-ambjent naturali

Tkellem dwar l-ambjent tal-kampanja:

1.Il-ħdura, il-fjuri u s-siġar ta’ Malta

2.L-annimali differenti

3.L-għasafar

4.Il-ħidma fir-raba’ u l-għelieqi

5.Xogħol il-bidwi

6.Frott u ħaxix frisk – tajbin għas-saħħa

Tkellem dwar il-baħar:

1.Ħut differenti

2.Bajjiet differenti – biċ-ċagħaq, bir-ramel, bil-blat

3.Xogħol is-sajjieda

4.Ħut frisk – tajjeb għas-saħħa

Tkellem dwar il-passatempi fin-natura:

1.L-għawm

2.Il-mixi

3.Is-sajd

4.L-absailing

5.Tlielaq bid-dgħajjes/Regatta



Id-divertiment

Tkellem dwar id-divertiment fid-dar:

1.It-televixin

2.Il-qari

3.Il-mużika

4.It-tisjir

5.L-internet (virtwali)

6.Mal-ħbieb, mal-familja jew waħdek

7.B’ilbies komdu

8.Mingħajr periklu

Tkellem dwar id-divertiment fiċ-ċentri u l-għaqdiet:

1.Mezz ta’ soċjalizzazzjoni

2.Tħaddem it-talenti tiegħek

3.Tagħmel il-ħbieb

4.Mhux tard billejl

5.Opportunità ta’ xogħol volontarju

Tkellem dwar id-divertiment f’postijiet oħra, per eżempju ċ-ċinema u r-restorants.

Tkellem dwar il-benefiċċji tad-divertiment:

1.Tistrieħ

2.Tagħmel ħbieb ġodda

3.Taqta’ mir-rutina

4.Tissoċjalizza

5.Tnaqqas l-istress

6.Tiżvoga

7.Iżżomm ruħek b’saħħtek

8.Titgħallem affarijiet ġodda

Attenzjoni minn: kumpanija ħażina, vizzji, perikli u affarijiet illegali.

L-ivvjaġġar

Tkellem dwar mezzi differenti ta’ trasport:

1.L-ajruplan

2.Il-vapur

3.Il-karozza

4.Il-katamaran

5.It-tren

Tkellem dwar għaliex tista’ tivvjaġġa:

1.Vaganza

2.Xogħol

3.Kura barra minn Malta

4.Vjaġġar ġol-istess pajjiż

Is-sabiħ tal-ivjaġġar:

1.Kulturi/tradizzjonijiet differenti

2.Pajjiżi/ambjenti differenti

3.Nies ġodda

4.L-istorja u l-ġografija tal-pajjiż

L-ikrah tal-ivjaġġar:

1.Tisrif ta’ flus

2.Trid tippakkja minn kmieni

3.Attent li ma titlef xejn

4.Trid bilfors tirkeb it-trasport

5.Mhux kollox jogħġbok

Il-kura tas-saħħa

Trid titkellem dwar il-kura u l-prevenzjoni:

1.Eżerċizzju fiżiku u tajjeb

2.Dieta bbilanċjata

3.Ilma

4.Ma tpejjipx/ma tixrobx/tixrob b’limitu/ma tiħux drogi

5.Testijiet regolari

6.Iġene tajba

Fl-Ewropa għandna l-E-111 (EHIC). Barra mill-Ewropa trid tkun assigurat.

Qabel ma ssiefer tlaqqam!

L-edukazzjoni

Tkellem dwar l-edukazzjoni formali:

1.Obbligatorja sa 16-il sena

2.Edukazzjoni primarja, sekondarja, post-sekondarja

3.Il-mużew u d-duttrina

4.L-Università (edukazzjoni terzjarja) – Baċellerat, Masters, Dottorat

Tkellem dwar l-edukazzjoni informali:

1.Gruppi u għaqdiet; eż scouts

2.L-isport u l-arti marzjali

3.Strumenti mużikali, arti, żfin, kant u reċtar, tisjir u ħjata...

4.L-użu tal-kotba u t-TV b’mod edukattiv

Ix-xiri

Tkellem dwar l-importanza tax-xiri:

1.Il-pajjiż ikun sejjer tajjeb/ħażin ekonomikament

2.Ċerti żminijiet huma aktar popolari għax-xiri: Il-Milied, l-Għid u l-festi tar-raħal

Tkellem dwar it-tipi ta’ ħwienet:

1.stabbilimenti kbar (shopping arcades) u żgħar

2.Internet

3.Monti jew bejgħ minn karozzi/vannijiet